Morz

Morz, qui m'a mis muer en mue
En cele estuve o li cors sue
Ce qu'il fist el siecle d'outrage,
Tu lieves sor toz ta maçue,
Ne nus por ce sa pel ne mue
Ne ne change son viez usage.
Morz, toi suelent cremir li sage:
0r queurt chascuns a son damage:
Qui n'i puet avenir si rue.
Por ce ai changié mon corage
Et ai laissié et gieu et rage:
Mal se moille qui ne s'essue.




Morz, va m'a çaus qui d'amors chantent
Et qui de vanité se vantent,
Morz, qui nos as toz pris al laz,
Qui en toz lieus fais verreglaz
Por nos faire verreglacier,
Certes, voirs est que je te haz,
Mais çaus o je t'envoi non faz,
Ainz le faz por aus solacier
Tant qu'aves les ait faiz o maz.
Mais qui te voit s'ame enlacier
De totes parz et embracier,
Fous est s'il ne l'est ses degraz.

Morz, trai ton cor, et si le sonne
A proneroi et a Peronne:
Fai que Bernarz primerainz l'oie,
Qui plus est près de sa coronne,
Se dieus nel refuse et seonne
Aussi comme fausse monoie.
Morz, di li que bien sès la voie
Al jovencel qui se destroie
Quant Damedieus santé li donne,
Et quant li tout, si le reproie:
Hors est del ploi de la coroie
Qui ne crient Dieu fors quant il tonne.

Morz, morz, qui ja ne seras lasse
De muer haute chose en basse:
Trop volentiers fesisse aprendre
Ambesdeus les rois, se j'osasse,
Com tu trais raseor de chasse
Por rere çaus qui ont que prendre.
Morz qui les montez fais cendre:
Tu as tramail et roiz et nasse
Por devant le haut homme tendre
Qui por sa poesté estendre
Son ombre tressaut et trepasse.

Morz, tu abaz a un seul tor
Aussi le roi dedenz son toit:
Tu erres adès sanz sejor
De paier Dieu trestot son droit.
Morz, tu tiens tant l'ame en destroit
Qu'ele ait paié quanqu'ele doit,
Sanz nul restor et sanz retor.
Por c'est fous qui sor s'ame acroit,
Qu'ele n'a gage qu'ele ploit,
Puis qu'ele vient nue a l'estor.

Morz, mout as bien assis le monde
De totes parz a la ronde:
Tu lieves sor toz ta baniere,
Tu ne trueves qui te responde
Ne par force ne par faconde,
tant par as espoentant chiere.
Tu nos assauz en tel maniere:
De près jetes a la perriere,
De loing menaces a la fonde.
Tu tornes ce devant derriere,
Car primeraine fais la biere
Qu'enattendoit tierce o seconde.

Morz, douce as bons, as maus amere,
A l'un est large, a l'autre avere,
Les uns chace, les autres fuit.
Sovent al juevne avant fait here
Et prent le fil devant le pere
Et qu'eut la flor devant le fruit
Et le cors bote ainz qu'il s'apuit
Et tout l'ame ainz qu'ele s'acuit
Et fiert ançois qu'ele s'apere.
Morz va comme lerres par nuit
Et l'endormi en son deduit
Semont tost, avant de lui rere.

Morz, qui est a veüe escrite
En la vieille face despite,
Se repont bien es jovenciaus,
Et plus entor çaus se delite
Qui par fierté li dient: "Fui te!"
C'est en cez cointes damoisiaus
Qui vont as chiens et as oisiaus,
Et font homage as bon morsiaus,
Qui plus ardent que leschefrite:
A çaus gieue morz de coutiaus
Et lor afuble teus mantiaus
Qu'en plain miedi lor anuite.

Morz, o tuit sommes en atente
Que tu somoignes ta rente,
Bien nos as fort loié le point:
Tu prenz celui en sa jovente,
A vint et huit anz a trente,
Qui cuide estre en son meilleur point.
Com plus s'acesme et plus se joint
Tost l'as de ton aguillon point
Qui plus entosche que tarente.
Por c'est droiz que chacuns ressoint,
Car cui deliz del siecle voint
Mout part de lui s'ame dolente.

Morz est la roiz qui tot atrape,
Morz est la mains qui tot agrape;
Tot li remaint quanqu'ele aert.
Morz fait a toz d'isembrun chape
Et de la pure terre nape,
Morz a toz oniement sert,
Morz toz secrez met en apert,
Morz fait franc homme de cuivert,
Morz acuivertist roi et pape,
Morz rent chascun ce qu'il desert,
Morz rent al povre ce qu'il pert
Morz tout al riche quanqu'il hape.

Morz fait a chascun sa droiture,
Morz fait a toz droite mesure,
Morz poise tot a juste pois,
Morz venge chqcun de s'injure,
Morz met orgueil a porreture,
Morz fait jaillir la guerre as rois,
Morz fait garder decrez et lois,
Morz fait laissier usure et crois,
Morz fait de sëf vie dure,
Morz as poerees et as pois
Donne saveur de bon craspois
Es cloistres o l'en crient luxure.

Morz apaise les annoisiez,
Morz acoise les envoisiez,
Morz totes les meslees fine,
Morz met en croiz toz faus croisiez,
Morz fait droit a toz les boisiez,
Morz toz les plaiz a droit termine,
Morz desoivre rose d'espine,
Paille de grain, bren de farine,
Les purs vins de faus armoisiez;
Morz voit par mi voile et cortine,
Morz seule se et adevine
Com chascuns est a droit proisiez.

Morz, honiz est qui ne te crient,
Et plus honiz cui d'el ne tient
Fors c que vie ne li faille:
Faillir sanz faille la convient,
Peu la tendra qui plus la tient,
Quonqu'en aloigne morz retaille.
Mais li fol dient: "Nos que cahille
"De quel eure morz nos assaille?
Prendrons or le bien qui nos vient!
Aprés que puet valoir si vaille:
Morz est la fins de la bataille
Et arme et cors noient devient."

Pieç'a que ceste erreurs comence:
De ceste seculer science
Dont fu la viez filosofie
Nasqui ceste pesme sentence
Qui tout a Dieu sa providence
Et dit qu'autres siècles n'est mie.
Selonc ce a meilleur patrie
Cil qui s'abandonne a folie
Que cil qui garde continence.
Mais certes, s'il n'est autre vie,
Entre ame a homme et ame a truie
N'a donques point de diférence.

Hélinant